Gipanghimakak ni Gobernador Henry S. Oaminal sa probinsya sa Misamis Occidental, ang alegasyon sa kampo ni Bonifacio elected mayor- Mayor Samson Dumanjog nga pugsanong pagpakanaug kaniya sa munisipyo sa iyang lungsod.
Diin, sa niaging press conference nga gipahigayon sa buhatan sa gobernador, kaniadtong Hunyo 19, 2023 kauban ang PDRRMO Retired BGen. Joseph Villanueva, ug ang Incident Command System (ICS) sa Misamis Occidental sa iyang buhatan, hugot nilang gipanghimakak ang maong mga alegasyon.
Matud pa ni Oaminal, nga malinawon ang gipahigayon nga pagdakop kang suspended Mayor Samson Dumanjog sa Bonifacio, Misamis Occidental kaniadtong Hunyo 16, 2023, pinaagi sa hiniusang pwersa sa INCIDENT COMMAND SYSTEM ug kapulisan, gumikan sa pagpadayong pag-okupar sa Office of the Municipal Mayor sa Bonifacio, human siya gi-suspended sa Sangguniang Panglalawigan sa Misamis Occidental, sulod sa 60 days, nga nagsugod kaniadtong May 30, 2023, samtang gihikay ang kasong BETRAYAL OF PUBLIC TRUST batok kaniya.
Apan, sukwahi ang mga gipamulong ni Gobernador sa maong presscon, kumpara sa mga nagviral na mga video footages atol sa pagpakanaug sa mayor sa Bonifacio, diin nakuhaan pa sa video nga gipangbuak ang glass windows sa opisina sa mayor sa mga lalaki nga nakabonnet mask.
Samtang, padayon pa ang makuting imbestigasyon kalabot sa maong panghitabo nga gikakuyaw sa katawhan sa Misamis Occidental.-END