Gipaniguro ni Achievement with Integrity Movement AIM standard bearer ug City Mayoralty bet, Idol Brigada Elmer V. Catulpos ngadto sa katawhan nga tagaan nilag hinlo nga panggobyerno ug walay korapsiyon ang ilang pagdala sa siyudad kauban ang grupo ugaling matagaan og kahigayonan.
Matud ni Idol Brigada Elmer, katungod ug kinahanglan sa katawhan ang tinuod ug klaro nga serbisyo ilabi na ang mga ordinayong kaigsuonan sa Gensan tungod sila ang ilabihang naapektuhan sa krisis sa pandemya.
Gisaad usab niini nga makalaom ang taga-Gensan nga dili sila pakyason sa pamilyang AIM ug kini na matud pa ang panahon nga magtinabangay ang tanang katawhan sa dakbayan.
Gibarugan usab ni Idol Brigada Elmer nga bisan daghang grupo ang gusto og kaayuhan apan gitumbok niini nga usa ra ang Gensan, usa ra ang katawhan ug bisan unsa pa ka nga kolor sa politika usa ra ang siyudad nga kinahanglang ayuhon busa kinahanglan nga magtinabangay.
Mensahe ni Idol Brigada Elmer nga ang Gensan atoang balay, atoang bahandi ug atong garbo nga pwedeng mabilin alang sa mga kabataan ug sa mga mosunod pa nga henerasyon.