HUMAN sa halos duha ka tuig sa unang higayong balik tulunghaan na ang grade 2 pupil nga si Adrian sa Aspang, Elementary School sa General Santos City. Dungan sa limited mode gihapon nga ‘pilot’ face-to-face (F2F) nga gipatuman sa tibuok nasud.
Matud ni Adrian, excited siya sa pagbalik sa tulunghaan rason nga naka-uniporme bisan paman dili mandatory ang suot dayon niini. Butyag usab ni Sheila Villanueva, grade-2 teacher luyo sa kalisod sa preparasyon alang sa F2F classes partikular na ang pagbiyahe og halos duha ka oras gikan sa ilang balay padulong sa Barangay San Jose apan ‘worth it’ kini human nakita ang pahiyom sa iyang mga estudyante nga excited nga sugdan na ang in-person classes.
Nagmalampuson usab ang F2F classes sa siyudad, butyag ni Romelito Flores, DepEd- GenSan Schools Division Superintendent. Ang maong tulunghaan ang dunay kinatibuk-ang 105 ka enrollees gikan kindergarten hangtud Grade 3. Base sa DepEd guidelines, ang F2F classes limitado lang sa upat ka oras matag adlaw ug gitunga duha ka set nga dunay 12 ka estudyante matag classroom.
Estrikto usab nga gipatuman ang health protocols sama sa pagsuot og face mask sulod sa campus ug sa classroom, nay hand washing facility ug temperature scanner. Ang partisipasyon sa mga estudyante sa F2F classes ang boluntaryo ug dunay gipirmahang parent consent. (Richel Gubalani)