NAKAALERTO ang kapulisan sa probinsya sa Misamis Occidental, kalabot sa pagpamusil-patay sa usa ka radio broadcaster kaniadtong Nobyembre 5, pasado alas singko sa buntag mismo sa iyang studio, nga nahimutang sa iyang panimalay sa Brgy. Don A. Neri, Calamba, Misamis Occidental.
Diin, usa ka Johny Walker Special Investigation Task Group ang gimugna karon sa Misamis Occidental Police Provincial Office, kauban ang CIDG 10, Police Intellegence Unit 10, ug Calamba Municipal Police Station, alang sa paspas nga pagresolba sa kaso.
Sa pagkakaron, base sa pamahayag sa pamilya ug nakawitness sa panghitabo, nagpagawas ang Johny Walker Special Investigation Task Group og computerized facial composite sa giingong usa sa mga suspek nga nipusil sa magsisibya.
Matod pa ni PNP Public Information Office Chief Col. Jean Fajardo, ang suspek kuyog sa gunman kinsa gibiyaan sa gate dihang gipusil ang biktima, nga gibana-banang anaa sa 5’5 ngadto sa 5’6 ang gitas-on, nagpangidaron og 40 anyos pataas ug brown ang kolor sa panit, ug kasarangang lawas ug gibana-bana nga 70 kilos ang gibug-aton.
Dugang pa, ang suspek nagsul-ob usab og pula nga kalo, green nga t-shirt ug itom nga short dihang nahitabo ang krimen.
Kon kahinumduman, base sa taho, ug mga nikatap nga CCTV Footages, 3 ang gitudlo nga wala mailhing suspetsado, diin ang usa niini, ang deretso nisulod sa studio sa biktima, ug deretsong gipusil kini panahon sa iyang programa, ug paspas nga gikuha ang kwentas niini human sa pagpamusil, ug nisibot sa wala matinong deriksyon.
Sa laing bahin, taliwa sa sunod-sunod nga pang-atake karon sa probinsya sa Misamis Occidental, giklaro ni PCol. Dwight D. Monato, Acting Provincial Director sa Misamis Occidental, Police Provincial Office, nga dili inter-related ang kaso ni Jumalon, kon dili, isolated nga kaso kini. //END