Miabot sa sobra P3.6 bilyones ang kapital nga gibubo sa mga bag-ong negosyo sa probinsya sa Davao del Norte taliwala sa pandemya niadtong 2020-2021.
Sa tala sa Davao del Norte Investment Promotion Center (DNIPC), ang maong kantidad gitampo sa dul-an 17,000 ka mga bag-ong business registrants.
Butyag ni DNIPC Chief Joevynar Miedes nga sa tuig 2021, moabot sa kinatibuk-ang sa P1.55 billion ang mga investments nga gibubo sa 7,707 ka mga bag-ong negosyo, diin wa pay labot niini ang report gikan sa Sto. Tomas, San Isidro, Talaingod ug Island Garden City of Samal alang sa mga bulan sa Nobiyembre ug Disiyembre.
Kahinumduman nga sa tuig 2020, duna sab P2.085 billion ang gitampo sa mga mamuhunan sa 8,365 ka mga bag-ong negosyo ug industriya sa tibuok probinsya.
Sa mga dakbayan sa lalawigan, pinakadaghan ang namuhunan sa Tagum City sa tuig 2021, nga mikabat ngadto sa 1,656 ka mga bag-ong negosyo nga mibalor sa P482 million.
Samtang sa mga lungsod, nanguna sab sa gidaghanon ang Sto. Tomas nga dunay 1,120 ka mga bag-ong negosyo sa kantidad nga P121 million. Apan, nalabwan kini sa pamuhunan sa Carmen nga mokabat ngadto sa P250.5 million nga gibubo alang sa 619 lang ka mga bag-ong pamatigayon sa milabay nga tuig.
Tungod niini, nahimo na nga grandslam awardee ang Davao del Norte isip Most Business-Friendly Province sa tibuok Rehiyon 11, human nga namintinar sa lalawigan ang maong pag-ila sulod sa na lima ka tuig.
Sagunson nga nahimo sab nga Overall 2nd Most Competitive Province ang probinsya sa mga tuig 2020 ug 2021, samtang nagpabilin kini nga Most Competitive Province sa tibuok Mindanao.BNFM- DAVAO
