Padayon ang Davao City Anti-Scam Unit sa pagsubay sa mga establishemento nga gahimo ug peke nga vaccination cards ug vaccination exemption cards.
Gikanayon ni Anti-Scam Unit Head Simplicio Sagarino nga human nga duna silay na-entrap diha sa Diaz Mall nga nagahimo ug peke nga mga vaxx card, mas gipahugtan pa nila ang ilang monitoring sa nasampit nga establishment.
Una na nga nagpahimangno si Davao City Mayor Inday Sara Duterte ngadto sa publiko batok sa mga naga-proseso ug ga-isyu ug vaccination exemption cards ug unauthorized vaccination cards.
Gipasabot usab sa Interior and Local Government (DILG) ang publiko nga walay Covid-19 vaccination exemption cards nga gipanghatag nagdto sa mga nabakunahan.
Abri sab ang Anti-Scam Unit nga anaa nahimutang sa Door 7, Ramon Magsaysay Park Complex ning syudad gikan alas otso sa buntag hangtod alas singko sa hapon sa bisan unsa mang mga reklamo kalabotan sa mga transaksyon sama sa unauthorized vaccination cards, investment scams ug uban pa. BNFM-DAVAO
