MOKABAT na sa kapin 400 ang patayng lawas nga na-cremate sa General Santos City sukad pagsugod sa pandemya, kana ang gikompirma ni Phm-mha Anarosa Mangoramas, usa sa nag manage sa Montecielo crematorium facility.
Nagkantidad sa P35,000 pesos ang presyo sa cremation, apan nagahatag ang Montecielo og discount ngadto sa mga senior citizen, PWD’s, ug sa mga indigent nga adunay mga certificate gikan sa DSWD o sa Barangay.
Gidugang ni Mangoramas nga duha ka oras ang kadugayon sa pag-proseso sa cremation sa patayng lawas, ug sulod sa usa ka adlaw anaa lamang sa 12 ka cadaver ang ilang gina-cremate.
Kasagaran matud pa niini ang mga senior citizen, nag- edad sa 91 ang pinaka tigulang ug anaa sa unom ka bulan ang pinakabata nga patayng lawas ang ilang na-cremate tungod natakbuyan sa Coronavirus disease.
Samtang kadtong mga trabahante sa Montecielo crematorium wala na usab gauli sa ilang mga pamilya, nagpabilin na lamang kini sa ilang ginatrabahoan diin suportado usab sila sa kompanya sa ilang mga pagkaon ug gastohonon sa matag adlaw.
Nagpaabot usab og pagpahinomdom si Mangoramas sa tanang katawhan sa dakbayan sa Gensan nga kanunayng magmatngon ug magsunod sa simpleng protocol ang pagsoot og facemask ug faceshield, paghugas sa kamot ug magpabilin sa panimalay kung walay importante nga adtuan aron matud pa dili na mutaas ang kaso sa COVID-19. ( Enamie Mogpon)