KALIBO, AKLAN—Plano makarun it LGU Kalibo nga mag-usoy it lugar nga himuon ng kadugangan nga sementeryo mag-eowas pa sa planong pagpatindog it kaugalingon nga crematorium.
Ginpahayag ni Kalibo Mayor Emerson Lachica nga do presenteng sitwasyon it sementeryo makarun hay gutok eon kung siin do burial ground para sa mga namatay nga Kalibonhon bangud sa COVID-19 hay ginapatigayon sa mga bakante apang maisot nga porsyon it sementeryo.
Dugang pa ni Mayor Lachica, kung madayon do Public Private Partnership (PPP) agreement sa tunga it LGU ag it pribadong negosyante hay owa it pagagastuson do banwa.
Sa anda sigon nga paunang pag-istorya, do pagakitaon sa crematorium hay 60% do maadto sa pribadong negosyante ag 40% man do maagto sa kaban it Kalibo.
Samtang, ginpahayag man ni Engr. Marlo Villanueva, Municipal Planning and Development Coordinator nga kung may una eon nga crematorium do Kalibo hay magataeana sanda it pondo agud nga do LGU do magasabat sa bayad sa pagpacremate it mga indigent nga Kalibonhon nga namatay bangud sa nasambit nga baeati-an. // SHERRY ANNE REUNIR-VIDAL