KABANKALAN CITY, Negros Occidental, Philippines — Naka-agum sang pila ka pilas sa lawas ang isa ka 23-anyos nga lineman sang Philippine Long Distance Telephone (PLDT) company, matapos ini ma-kuryente sa Brgy. Pook , Banwa sang Hinoba-an, tinalikdan nga adlaw sang Martes, Abril 9.
Ang biktima ang gin-kilala kay Quelopas Panangganan, residente sang Camindangan, isa ka nabukid nga barangay sang syudad sang Sipalay.
Suno sa imbistigasyon sang kapulisan, naga kay-o ini sang linya sang internet matapos nga indi hungod nga na tandugan sang biktima ang isa ka live nga kuryente nga amo ang gina-lantaw nga rasun sang iya pagkahulog sa iya sini ginatinduhan nga hagdanan.
Gilayon naman ini nga gindala sa isa ka ospital sa banwa kag Naka-angkon ini sang pila ka minor nga pilas sa lawas, apang yara na sa istable nga kondisyon.*