Wala sang may patimaan ukon sang anuman nga senyales sang paglapta sang Lambda variant sang Coronavirus – 19 ( COVID-19 ) sa lugar sa banwa sang Valladolid, Negros Occidental nga ginapuy-an sang 35 anyos nga iloy ginpahayag sang Department of Health nagpositibo sa amo nga variant sandig sa ginpatigayon nga genome sequencing sang UP- Philippine Genome Center.
Ini ang ginpaalinton ni Governor Eugenio Jose Lacson. Suno kay Lacson wala pa sang update sa pagka-karon nahanungod sa verification kag investigation sang Provincial Health Office natuhoy sa amo nga kaso, magluwas lamang nga ginpaidalom liwat ang mag-iloy sa RT-PCR test sandig sa nangin rekomendasyon sang DOH sa diin ang resulta nagapahayag, ini sila ang lunsay negatibo.
Samtang sa pihak, wala sang may nabaton nga pasalig si Governor Lacson halin sa AstraZeneca nga sa liwat nila nga pagdeliver sang vaccine nga ginbakal sang probinsya ang madamo-damo na kumparar sa una nila nga ginpadala sa Negros Occidental.
Sa nahibaluan ang Kapitolyo Probinsyal ang nagbakal sang 100 mil ka doses sang AstraZeneca vaccine pinaagi sa tripartite agreement.