Gipalawman pa karon ang imbestigasyon kalabotan sa nahitabong pagpamusil diin biktima ang mag amahan alas-4:40 kagahapon sa hapon, Enero 23, 2024 sa Sitio Lumundao Brgy Marilog, Marilog District, ning syudad sa Davao.
Ang mga biktima nailang sila Gil Peraales Paican, 32, ug ang anak niini nga si Lady Aisha Caminade Paican 14 anyos, puros residente sa nasangpit nga lugar.
Saysay sa nakasaksi sa panghitabo nga si Alyas Marlon, 40 anyos, igo lamang naglingkod atubangan sa ilang balay ang mga biktima daplin sa National Highway sa dihang kalit na lamang milanog ang tulo ka mga buto sa armas.
Ila na lamang nakita nga samdan na ang biktima.
Dali sab nga misibat ang suspek nga gituohang nisakay sa itom nga behikulo nga namatikdang naka park atbang sa gikahimutangan sa mga biktima ayha paman nahitabo ang pagpamusil.
Gisuta pa sa kapulisan sa Marilog kung unsa ang motibo sa krimen.
Samtang, gidala sa Isaac Robillo Hospital, Calinan ang mga biktima alang sa medikasyon.