CAMARINES NORTE- Umaabot sa PhP 108,800.00 na halaga ng hinihinalang shabu ang nakumpiska sa dalawang tulak umano ng iligal na droga sa isinagawang buy bust operation Miyerkules ng gabi sa Purok 1, Barangay Tugos, Paracale, Camarines Norte.
Arestado naman ang dalawang suspek na kinilalang sina alyas “Tino” 27 anyos, may kinakasama, walang trabaho at si alyas “Marko”, 21 anyos, binata, walang trabaho kapwa residente ng nabanggit na lugar.
Ayon sa Paracale Police, natimbog ang dalawa matapos na kumagat sa naturang anti-illegal drug buy-bust operation.
Nakuha sa operasyon ang buy-bust item na isang 1 medium na pakete ng hinihinalang shabu, pitong medium na pakete ng hinihinalang shabu na nakuha sa suspek na si “Tino” at isang medium na pakete naman ang nakuha sa supek na si “Marko.
Nakuha rin sa pag- iingat ng suspek ang ginamit na boodle money na nagsilbi bilang buy-bust money.
Aabot sa 16 na gramo ang timbang ng mga nakumpiskang iligal na droga.
Mahaharap ang mga suspek sa kasong paglabag sa Sections 5 at 11 Article II ng RA 9165 o Comprehensive Dangerous Drugs Act of 2002.