Nagpalab-ot sang reklamo ang pamilya sang pasyente nga napatay bangud sa ginaalegar kapabayaan sang doktor kag nurses sang Mambusao District Hospital.
Sa interview sang Brigada News FM kay alyas “Mae”, isa sa mga bata sang napatay nga pasyente, ginpahayag sini nga ginpadangat nila sa Mambusao District Hospital ang ila iloy bangud naglain ang pamatyag, apang pag-abot sa emergency room nagpahayag ang doktor nga kinahanglan i-transfer sa iban nga ospital ang pasyente bangud kinahanglan ini nga i-ICU.
Suno kay alyas “Mae,” luyag nila tani nga didto nalang sa ospital sa syudad sang Iloilo i-transfer ang ila pasyente bangud nakasigurado sila nga madamo didto sang mayad nga doktor, apang ginsilingan sila sang nurse nga kinahanglan tubuhan ang iya iloy tungod nabudlayan maginhawa.
Ginpahayag ni “Mae,” wala sila nagsugot nga tubuhan bangud nakita na nila nga nabudlayan ang ila iloy, kun sa diin nagperma ini sang tatlo ka waiver.
Nahibaluan, ang findings sang doktor sa pasyente, nabugtuan ini sang ugat sa ulo rason nga nabudlayan makaginhawa kag makahambal.
Dugang pa ni “Mae,” sobra ka dugay ang ila hinulat bangud nagapanawag pa ang mga nurse sa iban nga ospital sa Roxas nga may available nga ICU tubtob nga sila na mismo ang nagpangita sang pamaagi sa katuyuan nga ma-transfer gilayon sa iban nga ospital ang ila iloy.
Sang may available na nga ICU, wala naman sang ambulansya nga magadul-ong kag ginsilingan naman sila nga maghulat.
Gintuad man ni “Mae” nga sang ulihi, gin-istorya siya sang isa ka lalaki nga isa sa mga requirements nga mapasulod sa ICU ang pasyente kinahanglan ini tubuhan, rason nga nagsugot nalang ini agud makahalin na sa Mambusao Hospital.
Apang sang natubuhan na ang iya iloy, masobra duha naman ka oras ang ila hinulat tubtob nga nabugtuan na sang ginhawa ang pasyente kag wala gid ma-transfer.
Suno kay “Mae” ginhinulat pa ang nurse nga magaupod sa ambulansya rason nga nadugayan ang paglakat.
Sa karon, tuman ang kasubo sang pamilya sa nadangatan sang pasyente.
Nagapati si “Mae” nga kun nadala gilayon sa ICU ang ila iloy, wala kuntani ini napatay.
Nagalaom ang pamilya nga matagaan sang pagtamod ang nasambit nga problema agud indi na maliwat sa iban nga mga pasyente. | Judy Ann Juare