LEGAZPI CITY – Dai pig-uyonan ni Mayor Caloy Baldo kan Camalig an rekomendasyon kan Philippine Institute of Volcanology and Seismology (PHILVOCS) na magbugtak nin relocation site para sa mga residentes na nakaistar sa laog kan 6km permanent danger zone kan Bulkan Mayon.
Sa eksklusibong pakikipag-olay saiya kan Brigada News FM Legazpi, sinabi niyang mapagal nang i-relocate an mga ini ta dakol na man sindang binugtak na relocation site alagad an mga residente, nagbaralik man sana sa saindang mga orihinal na harong huli ta yaon duman an saindang kabuhayan.
Para sa alkalde, mas maray na dakulang evacuation center na sana an saindang ibugtak nganing igwa nin maiistaran an mga ini kun liwat nagkaigwa nin pag-alburoto an bulkan, asin pag normal na, makakatarabaho na nin tultol asin matutukan na an mga kabuhayan sa lugar.
Sa ngunyan, mantenido an numero kan mga evacuees sa banwaan – dai man ini su boot mabago asin dai man papaurulion hasta sa dai ibaba kan PHILVOCS an alert level kan bulkan.