DAGHAN ang matabangan sa gilusad nga METAL HORSE Project sa General Santos City Police Office kun GSCPO.
Kini ang gibutyag ni Police Col. Jomar Alexis Yap, City Director sa GSCPO nga gisunod sa Project HORSE o Hinterland Operations Response for Services and Emergencies ni Regional Director PBGen.Jimili Macaraeg sa Police Regional Office 12 ang maong proyekto.
Apan segun ni Yap, imbes kabayo ang gamiton sa kapulisan aron maadtoan ang mga lagyong lugar panahon sa kalamidad ug unsa mang emergencies, sa METAL HORSE project kun Motorcycle Enthusiast Trail Assistance League- Hinterland Operations Response for Services and Emergencies, mga motorsiklo, ingon man 4 wheel vehicles ug jet ski ang gamiton.
May nag-volunteer nga mopagamit og jet ski, nga magamit sa mga area sa GenSan nga duol sa dagat ug may mga motocross enthusiasts ang motabang usab sa maong project.
Alang kang Yap, halapad pa ang mga utlanan lugar sa GenSan nga angayang maproteksyunan, ug sa tabang sa METAL HORSE, mapugngan ang unsa mang dili maayong plano alang sa syudad.Gawas pa nga makatabang matud pa ang proyekto sa mga nanginahanglan sa serbisyo sa kapulisan, sa lagyong mga lugar.-