BICOL—Dae pa maisapinal sagkod ngunyan kan Department of Health (DOH) Bicol an kabilugan na bilang kan mga nabakunahan kontra COVID-19 sa isinagibong National Vaccination Days kan nakaaging semana huli ta igwa pa suboot nin mga nag-aarabot na report gikan sa mga LGU.
Marurumduman na pig ekstindir nin duwang aldaw an bakunahan sagkod kan petsa 3 kan Disyembre.
Sa probinsya nin Albay, uminabot na sa 66% kan target an mga nabakunahan kontra COVID-19. Katumbas ini nin 164,613 na inidbidwal hali sa 247,863 na target.
Susog sa kanya-kanyang target per LGU, an syudad nin Legazpi an nakapagbakuna nin sobra pa sa ipigtalaan na bilang kan mga dapat bakunahan.
Uminabot kaya ini sa 222% o katumbas nin 19,748 na inidbidwal hali sa 8,888 na target.
Nagsunod digdi an banwaan kan Tiwi na nakapagbakuna nin 82% kan saindang target. Katumbas ini nin 8,769 na vaccinated individuals hali sa 10,723 na target.
Nagpantulo an banwaan kan Polangui makalihis na mabakunahan an 79% kan saindang target o katumbas nin 16,421 kan 20,801 na target.
Ikaapat digdi an syudad nin Tabaco asin banwaan nin Manito na parehong naka 75% kan saindang target asin ikalima an banwaan nin Pio Duran nan aka 70% kan saindang target.
Dawa ngani dae naabot an 100% bilang kan mga dapat bakunahan sa Albay, dakula pa man liwat an piglalaoman na impact kan ginibong Bayanihan Bakunahan sa pag-abot kan herd immunity kontra COVID-19 sa probinsya.### | slm