KALIBO, AKLAN—Nagaabot eon sa 234,076 do mga nagparehistro para sa May 2022 Local and National election sa bilog nga Western Visayas.
Raya hay sandig sa datos it Commission on Elections (COMELEC) 6 humalin September 2020 hasta June 18, 2021.
Sa nasambit nga datos, do Negros Occidental kaibahan eon kara do Bacolod City do may pinakamataas nga registrants nga umabot sa 92,279, ginasundan it Iloilo Province kaibahan do Iloilo City nga may 78,232, Capiz kaeakip do Roxas City 26,588, Aklan 17,603, Antique 13,869 ag Guimaras nga may 5,005.
Do nasambit man nga numero hay 65-70% sa target it rehiyon kung siin target it COMELEC 6 do 350,000-400,00 new registrants.
Angot kara, nagpadumdom do COMELEC sa mga gustong magparehistro nga magdaea it valid indentification card, sariling ballpen ag kinahangean nga magsuksok it facemask ag faceshield.
Nasayuran nga do voters registration period para sa May 2022 election hay hasta eon lang sa September 30, 2021. // SHERRY ANNE REUNIR-VIDAL