GITUBAG sa Comelec GenSan ang hangyo sa Office of the Senior Citizens Affair (OSCA) nga mahatagan og iskedyul ang mga senior citizens sa GenSan sa pagparehistro alang sa 2023 nga SK ug Barangay Elections.
Sumala sa labaw sa OSCA nga si Josephine Mendoza nadawat nila ang sulat gikan sa Comelec kaniadtong Disyembre 6 sa kasamtangan nga tuig kung asa nakabutang ang ‘Special Sattellite Registration’ alang sa mga Senior Citizen sa Enero 9, 2023.
Usa ka adlaw ang gitagana sa Comelec nga pagparehistro alang sa tanang tigulang nga residente sa syudad, himoon kini sa Oval gym aron dili malisdan ang mga senior citizens sa pagparehistro.
Gawas niini duna usab registration sa matag barangay mamahimo lang nga mudool sa mga opisyal nga naa sa maong lugar.
Alayon niini hugot gipahinumdom sa mga personahe sa Comelec GenSan sa katawhan nga kinahanglang sundon ang mga protocol sa new normal; magsuot og facemask, magdala og kaugalingong alcohol, ug dal-on ang mga dokumento nga kinahanglanon sa pagparehistro.
Buot ni Mendoza nga mahatagan og pagtagad ang mga tigulang aron hapsay ang ilang registration ug dili sila malisdan.
Andam usab ang nasangpit nga buhatan sa pag-assist sa mga Comelec officials. I Enamie Mogpon