Dismayado nga nagpost sa anang social media account ro sangka motorista nga aksidente nga nasagi it nagalaylay nga wiring sa may Brgy. Andagao, Kalibo kahapon.
Base sa post sa facebook ni Joyhen Castro Gregorio, dismayado imaw sa natabo kana kapin sa anang pagpa blotter sa pulis bangud matsa owa segun ginataw-an it igtaeupangod ro anang reklamo.
Suno kay Gregorio, imaw pa segun ro ginapaagto it pulis sa pila ka telephone company agud masayran kung anyo nga wiring, bangud abo eon segun nga natabo nga kaparehung aksidente pero owa gid it nagaako nga kumpanya.
Hinambaean pa gid segun imaw nga sa kaabuon nga wiring malisud masayran kung anyo ag aeang aeang segun nga sakaon nanda ro poste ay bukon man it anda nga trabaho.
Paano lang suno kay Gregorio kung namatay ro nadisgrasya hay owa it hustisya dahil indi masayran kung anyo ro wiring. // ANN DESLENE SALAZAR