BICOL – MAABOT sa nueve sientos otsenta y otsong mga obreros sa Bicol an naresibe na an saindang benepisyo sa tabang kan Single Entry Approach (SEnA) program kan DOLE sa enot na kwarter kan taon.
Segun ki DOLE-Bicol regional director Ma. Zenaida Angara-Campita, maabot sa 17.5 million pesos an kantidad kan naipanaong ‘settlement claims’ gikan sa mga naresolbiran na labor dispute.
Dakulang bagay soboot an pakikipagtabangan kan duwang lado sa marikas na settlement asin pag-release kan monetary claims kan mga obreros.
Obheto kan SenA program na macierto an marikas ,hababang gastos, asin patas na pagresolbir sa gabos na isyu asin reklamo sa pagultanan kan mga obreros asin saindang mga employers.
Sa lindong kan programa, pigcicierto na gabos na reklamo an maagi nguna sa trenta diaz na mandatory conciliation asin mediation period tanganing mahanapan nin mga paagi pasiring sa fair settlement antes isalang sa arbitration o maging full blown dispute o labor case.
Ngunyan na semana sana , nasa anom na obreros an naresibe na man an saindang separation benefits matapos an labi duwang dekadang pagseserbisyo sa dati nindang kompanya.
Sa huri pig ingganyar kan DOLE-Bicol an iba pang obreros na i-file an saindang mga reklamo online gamit an free online service version kan programa na inapod bilang e-SenA.
Photo courtesy: DOLE-Bicol