MIKANAOG ang labaw sa National Bureau of Investigation (NBI) kauban ang NBI-Counter- Terrorism Division operative sa Soccsksargen. Kini aron sugdan ang imbestigasyon sa serye sa pagpamomba sa rehiyon gikan Enero 7,2021 asa target ang bus liners.
Matud ni Atty. Regner Peneza, labaw sa NBI-Sarangani District Office (NBI-SARDO) nakalabay’ng semana mikanaog ang grupo. Sa pagpanguna ni NBI director Eric Distor, kauban ang NBI forensic experts ug evidence response team nga gipangunahan ni NBI Deputy Director for Forensic Investigation Service Ferdinand Lavin ug Deputy Director for Intelligence Service Roel Bolivar.
Giangkon usab ni Peneza nga gimanduan ni Distor ang NBI regional directors ug opisyal nga motabang sa imbestigasyon. Ulahing insidente sa pagpamomba sa rehiyon mao ang nahitabo sa Koronadal City, South Cotabato atong May 26,2022.
Karong tuiga, upat ka bombing incident ang nahitabo una atong Enero 11 nga gikalambigitan sa Mindanao Star sa Aleosan,North Cotabato. Sunod atong Abril 24 human mibusikad ang eksplusibo sa Rural Tour bus sa Parang, Maguindanao asa tulo ka pasahero ang samaron. Labing ulahi ang duha ka pagbusikad atong Mayo 26, 2022 sa Koronadal City ug ang bomb explosion sa bakanteng luna sa Tacurong City. I Richel Gubalani