Ro resulta it botohan ku May 9, 2022 elections hay nagpakita sa kapag-on it partidong Tibyog Akean sa patag it pulitika iya sa probinsya it Aklan.
Raya hay matapos mailista ro record-breaking nga 85-thousand vote ni Governor-elect Jose Enrique “Joen” M. Miraflores kontra sa anang kasumpong nga si William Lachica.
Raya eon ro pinakamataas nga winning margin it mga boto para sa gobernador halin kat itukod ro Tibyog Akean ku 1995.
Kaparehu man raya sa nabuoe nga 51-thousand vote ni Re-elected Vice Governor, Atty. Reynaldo “Boy” M. Quimpo kontra sa anang kasumpong nga si Jonathan Cabrera.
Raya eon ro pinakamataas nga winning margin it mga boto para sa bise gobernador halin ku 1995.
Naangkon man it partidong Tibyog Akean ro 10, sa 10 nga puwesto sa Sangguniang Panlalawigan ag nagdaug it 15 sa 17 mayoral races sa nagkasari-saring munisipalidad it Aklan, nga isaea man nga record para sa local political party. / ANN DESLENE SALAZAR