BICOL – DAI na kaipuhan pag magluwas nin harong tanganing mahiling o makakua nin kopya kan PhilHealth membership record nin huli ta pwede ining gibohon online.
Ipiglansar na kaya kan Philheallth an online viewing kan member’s record na soboot mas pinadali asin pinasimple ngunyan na panahon nin pandemya.
Aram soboot kaya kan Philhealth an peligro na dara kan covid-19 asin kun magkakaigwa nin online services pwediser na dai na magpasiring pa sa saindang oficina asin maibitaran an posibleng urulakitan nin helang.
Segun sa Philhealth-Bicol, sa paagi kan Member Portal posible nang mahiling kan sarong miyembro kun updated an saiyang record, ma-check an kontribusyon siring man makapag download asin print kan Member Data Record o MDR.
Mantang tangani makagibo nin sadiring Philheath online account, i-access sana an saindang webiste na www.philhealth.gov.ph asin i-click an Online Services asin Member Portal kun saen pwede nang makapag create nin account.
Pagkatapos kaini i-click sana an verification link na ipapadara sa personal na e-mail tanganing ma-activate an ginibong account.
Oras na matrayumpong magibo an nasabing mga lakdang pwediser nang nang makapag log in sa saindang Member Portal gamit an Philhealth Identification Number (PIN) asin password kan miyembro.
Mahigpit sana man na pagiromdom kan Philhealth-Bicol, mantineron na pribado asin dai ipaghiras sa iba an log in details tanganing macierto an seguridad kan account asin mga impormasyon na nakapalaman digdi.