Gipakusgan pa karun sa Police Regional Office 10 ang pagpatuman sa balaod alang sa pagpakgang batok sa pagdagsang sa nagkalain-laing peke nga tambal sa rehiyon.
Kini human makumpiska sa Regional Special Operations Unit 10 ang gibanabanang balor 3.5 milyones pesos nga peke nga mga tambal diha sa Purok 6, Cabatuan, Brgy. Calabayan, Ozamis City, Misamis Occidental sa miaging adlaw.
Base sa imbistigasyon sa mga otoridad, nasikop ang suspek sa giingong distributor sa peke nga nagkalainlaing mga tambal si Leonardo O. Duma Jr, 56-residente sa maong dapit, pinasikad sa tulo ka Search warrants nga giisyu ni Hon. Judge Arthur Abudiente sa Regional Trial Court, 10th Judicial Region tungod sa kalapasan sa R.A. No. 9711 in relation sa R.A. No. 8203 o Special Law for Counterfeit Drugs.
Sa pagkakarun gikustodiya na sa Ozamis City Police Station ang suspek samtang gihan-ang tukmang kaso nga ipasang-at batuk niini.
Nasayran nga gimanduan ni Presidente Duterte ang DILG sa pagpagawas og direktiba sa pagdili sa mga “sari-sari stores” sa pagpamaligya og mga peke nga tambal.