Ginklaro nga ro rasun ham-an owa it pirma ro National ID hay para protektahan ro tanan bangud ro pirma hay pwedeng makopya.
Raya ro ginhayag ni Engr. Antonet Catubuan, Chief Statistical Specialist it PSA Aklan sa interview kana it Brigada News FM Kalibo.
Nasayuran nga sa National ID, ro ginabuoe eang hay fingerprint ag iris scan sa mata nga imaw ro pagahimuon nga basehan nga imaw gid ro nagapanag-iya it nasambit nga ID.
Kaangot man sa owa pag-acknowledge it pilang bangko sa national ID, ginhambae ni Engr. Catubuan nga nagpaguwa eon it memo ro Bangko Sentral ng Pilipinas sa tanan nga bangko nga batunon ro national ID sa anumang transaksyon it andang mga kliyente.
Sa pila man ka establisyemento nga owa nagabatun it national ID, igapaabot eon lang segun ni Engr. Catubuan ro nasambit nga concern sa andang national statistician.
Ginhayag man nga bisan may national ID hay pagagamiton gihapon ro pilang mga valid ID’s nga buyot it sangka indibidwal parehu it passport, PRC ag iba pa.
Pila man sa rasun kung ham-an nabubuhayan ro pag release it national ID it sangka tawo hay bangud sa duplication rasun nga gina-beripika pa raya it mayad.
Ro tinutuyo segun it national ID hay mataw-an ro pilang Pinoy it no expiration nga ID, eabi eon ro owa gid it bisan sambilog nga ID. / ANN DESLENE SALAZAR