NAKAULI na sa Gensan ang atleta nga nakasakmit og bulawang medalya sa SEA Games sa Hanoi, Vietnam apan nakasinati kini sa aberya sa gisakyang eroplano.
Sa kumpermasyon mismo ni Coach Raul Sevilleno alas dos sa hapon sa adlaw nga Huwebis ang unang schedule sa flight ni Rhichein Yosorez gikan Manila padulong Gensan airport apan alas otso sa gabei na kini naka-abot gumikan ang unang gisakyang eroplano sa Cebu Pacific adunay aberya.
Tungod niini nibalhin sila og laing eroplano nga sakyan og pasado alas otso sa gabei na niabot sa Gensan airport.
Human nga nakabalik sa Gensan pagkabuntag sa adlaw nga Biyernes niadto kini sa opisina sa City Sports Division samtang gina-andam ang pagkurtesiya niini sa opisina sa mayor.
Sumala kay sa labaw sa City Sports Division nga si Lady Manalo malipayon siya nga nakauli na si Yosorez gumikan dako kini nga inspirasyon sa mga mosunod nga mga atleta sa Gensan sa managlahi nga disiplina.
Kahibaluan nga si Yosorez ang nakasakmit og bulawang medalya sa dulang Muay thai sa SEA Games 2022 sa Vietnam.
Nagbansay sa Gensan ilawom sa pagdumala sa iyang amahan nga si Raul Sevilleno unya nakuha sa national team. I Ver Diazon