PRAYORIDAD sa health personnel sa Sarangani Province ang mga senior citizens alang sa inisyal nga rollout sa umaabot nga mga adlaw alang sa unang batch sa pagturok gamit ang Pfizer COVID-19 vaccines.
Matud ni Maria Razel Bustria, immunization coordinator sa Provincial Health Office target ang 2,340 senior citizens o lakip sa A2 priority group alang sa ‘expanded vaccination’. Gibutyag niini nga nakadawat ang Sarangani niadtong Sept. 28 og inisyal nga 780 vials kun 4,680 doses sa Pfizer vaccine gikan sa Department of Health-Region 12.
Ang pagdeliver sa mga bakuna ngadto sa ‘cold chain facility’ nga anaa sa PHO-Provincial DOH Office building sa Alabel ang nahitabo human nga nakuha sa sa provincial government ang pag-apruba alang sa paggamit sa bag-o nga naangkon nga ‘ultra-low freezer’ kon ULF unit.
Sa ilang pagbana-bana, gibutyag ni Bustria nga ma-akomodar og 2,340 indibidwal sa duha ka doses matag usa ang ‘available’ nga Pfizer doses nga iturok sulod sa 21 ka adlaw nga intervals. ( Richel Gubalani)