Gikatakdang sugdan sa pagtrabaho ang 254 ektarya nga Cordova Reclamation and Development Project (CRDP) sa lungsod sa Cordova sa dili pa matapos ang tuig 2023.
Kini kung mahuman na ang tanang dokumento nga gikinahanglan gikan sa Philippine Reclamation Authority ug ubang ahensiya sa gobyerno.
Nasayran nga ang nahisgutang proyekto mupalapad sa yuta sa Cordova ug dugang 254 ka ektarya.
Sa higayon usab nga makompleto ang reclamation sa sulod sa usa o duha tuig, sugdan dayon sa pagpalambo ang luna pinaagi sa Ulticon Builders Inc. (UBI) ug Premium Megastructures Inc. (PMI).
Base sa plano sa UBI ug PMI, ang unang site sa reclamation adunay mixed-use nga mga pasilidad sama sa mga opisina, retail shops, mga pasilidad sa kalingawan ug tukoron usab ang convention center.
Samtang sa ikaduhang site nga adunay 50 ka ektarya langkuban sa mixed residential ug business areas.
Gawas niini, tukuron usab ang pantalan ug terminal.//