LEGAZPI CITY – Inako na kan 31 anyos na suspek an panggadan niya sa saiyang barkada sa Purok 3, Brgy. Dita syudad nin Legazpi.
Segun sa report kan pulisya, personal na huminampang an suspek na si alyas “Roel” asin boluntad na suminuko sa Legazpi City Police Station asin sinabing siya an guminadan kay Raul Guerrero, 34 anyos na residente man kan nasambit na barangay asin tulos man itinukdo an lugar kun sain niya ginadan an biktima.
Tulos man nagpasiring an mga otoridad sa lugar tanganing i-verify an insidente asin naabutan nindang wara nang buhay an biktima.
Mientrastanto, sa intrevista sa pamilya kan biktima pati sa pamilya kan suspek, napag-araman na wara sindang aram sa insidente nin huli ta wara man ki naiistorya asin haloy nang magbarkada an duwa.