AMINADO karon si Francisco Alolod, manager sa customer service division sa General Santos City Water District nga dako ang kabalaka niini ugaling madayun ang open pit mining sa Tampakan, South Cotabato tungod maglisod unya sa suplay sa ilimnong tubig ang GenSan.
Segun niini, bisan kon layo ang Tampakan, apan ang source sa tubig ang interconnected, ug gani sa pagtuon kalabot sa water sources niadtong 1988, pinaagi sa National Statistical Coordinating Board, ang water supply sa GenSan ang medium yield lang ug naggikan pa sa South Central Mindanao.
Anaa sa bahin sa Liguasan marsh ug taliwala sa Mt. Parker ug Mt.Matutum ang maayong source sa tubig mao nga dako ang posilibidad nga gikan sa maong lugar ang source sa tubig dinhi sa GenSan.
Mao nga sobra ang kabalaka ni Alolod sa mahimong epekto sa open pit mining tungod matandog ang water reserves ug maapektohan ang source sa tubig alang sa GenSan.
Sa karon giangkon ni Alolod nga ang gigikanan sa tubig nga ginainom sa GenSan naggikan sa ground o pinaagi sa pagbomba ug maoy gina-distribute sa mga kabalayan nga gi-treat og chlorine.