GIHULAT sa Sangguniang Panlungsod nga makahatag og tubag ang SM mall sa GenSan kalabot sa insidente nga may nakuryentihan nga bata sa ilang mall.
Matud ni Kagawad Elizabeth Bagonoc nga wala nakaabot ang taga SM human nga ang imbitasyon kanila ang migawas sa oras mismo sa session mao nga wala usab makapangandam o makapadala og kinsa mang mosipot.
Dugang ni Bagonoc nga makaduso og lakang ang konseho aron mapugngan ang susamang insidente.
Nasayran nga mireklamo ang ginikanan sa 11-anyos nga bata nga nakuryentihan matud pa sa Christmas light sa maong mall apan wala madali paghatod sa ospital tungod walay ambulansya ang mall.
Kung dili makasipot ang taga mall, idayun nila ang imbestigasyon aron sayron kung kinsa ang may sayop sa insidente.
Ilaha usab iduso sa mga buhatan sa lokal nga panggamhanan nga magpahigayon og inspeksyon dili lang sa mga mall aron masiguro ang kaluwasan sa mga tawo labi na karong may pagdagsa sa mga tawo tungod sa Kapaskohan.