ANDAM magpadayon sa sakripisyo ang pipila ka transport groups sa GenSan gumikan sa bag-ong kamanduan aron mapakgang ang pagdugang sa mga kaso sa COVID-19.
Sa paghinabi sa 89.5 Brigada News FM GenSan sa chairman sa Modelong Tricycle Driver Cooperative nga si Rene Plenios sumala niini nga andam silang magpadayon sa ilang sakripisyo aron mapakgang ang pagkatag sa COVID-19.
Sa ilang bahin sa pagpamasada sa ilang mga sakyanan nga adunay rota gikan sa downtown padulong sa Barangay Conel ug Barangay Olympog sigurado matud pa nga adunay epekto sa ilang kita ang no movement on Sunday,kay bisan kon mogawas sila unya mamasada wala may pasahero kay gibawalan man nga mogawas.
Gidugang ni Plenios nga ilaha nalang sabton ang sitwasyon kay tinuod man gayod nga nisaka ang kaso sa virus ug napuno ang mga tambalanan mao nga sundon nalang nila ang mga polisiya sa gobyerno alang sa kaayuhan sa tanan.
Sa pahayag usab sa chairman sa Rajah Buayan Transport Cooperative nga adunay rota gikan sa Buayan padulong sa Barangay Apopong sumala ni Larry Villegas nga mopadayon nalang sila sa ilang ginahimo nga adjustment, gani ang wala na nila mahatag ang ubang benipisyo sa ilang mga personahe.
Sigurado matud pa nga may epekto kanila ang dili pagbyahe sa adlaw nga Dominggo kay sa ilang rota daghan ang naga-adto sa merkado ug sa mga malls ug nagataas ang kita sa mga driver,apan gumikan sa bag-ong restrictions ginalauman nila nga sa ubang adlaw mokusog ang byahe. (Ever Diazon)