HAPSAY ang klase sa kinatibuk-an, kini segun sa assessment ni Romelito Flores, DepEd GenSan Schools Division Superintendent sa gihimong paglibot suroy sa mga tulunghaan sa unang adlaw sa klase.
Segun ni Flores nga sa unang semana, nakatutok sa psycho social intervention ug dili direkta nga paghatag og lesson o pagtudlo ang buhaton.
Ang central office sa DepEd ang maoy nagmando sa pagpahigayon og psycho social intervention sa unang semana sa opening sa klase aron makondisyon ang mga bata sa pagbalik sa tulunghaan.
Samtang gitino ni Flores sulod na sa classroom ang pag-recess sa mga estudyante ug bisan sa pagpaniudto dili na tugutang makagawas.
Gitino sa nahisgutan nga alang usab kini sa kaluwasan sa mga bata hinungdan ginaawhag ang mga ginikanan nga makigtinabangay, pinaagi sa pagpabalon sa ilang anak.
Sa kasamtangan, gipatuman ang face to face classes asa dependi usab sa kadak-on ug resources sa usa ka tulunghaan aron mogamit og blended modality.
Dugang pa ni Flores, padayun usab nga modawat og late enrollees ang mga tulunghaan sa GenSan ug nanghinaut nga malabwan ang ilang ihap sa mga enrollees miaging tuig nga 151,047 itandi sa 134,536 as of August 15 sa private ug public schools sa syudad.