GIIMBITA sa Socsksargen Federation of Fishing and Allied Industries, Inc. (SFFAII) si Pangulong Ferdinand Marcos Jr., alang sa ika-22 Tuna congress sa Setyembre 1-2, 2022. Matud ni Dominic Salazar, Presidente sa SFFAII nagpadala na sila og imbitasyon sa buhatan sa Pangulo nakalabay’ng semana. Gihulat na lang nila karon ang mahimong tubag gikan sa buhatan sa pangulo.
Apan nangandam sila ugaling motambong si Marcos Jr. Matag tuig nagatigum ang mga Tuna industry players sa siyudad aron hisgotan ang nagkadaiyang hagit nga giatubang sa industriya. Lakip ang pagmugna og bag-ong estratehiya aron masustener ang init nga kompetisyon sa global markets. Gilaoman usab ni Salazar ang pagtambong sa gatusan ka mga foreign ug domestic tuna industry players.
Ang congress ang himoon sa trade hall sa SM Mall ug kini ang dunay tema nga “Braving Rough Seas Toward a Better Tomorrow”. Samtang sa exhibit i-feature ang pipila ka kompanya, government agencies ug pribadong grupo nga pangunahan sa Maritime Industry Authority (MARINA).
Ang SFFAII, ang dunay umbrella organization nga dunay pito ka asosasyon ug dunay 100 kompanya sama sa fishing, canning, fish processing, aquaculture production ug processing. Ang National Tuna congress ang highlight sa 2022 Tuna Festival. I Richel Gubalani