MAY upat ka suspek na nga mga detinado usab sa Tambler police station ang takdang kasuhan tungod sa pagkamatay sa usa ka detainee nga akusado sa sulay nga pagpanglugos.
Kini ang gibutyag mismo sa labaw sa Tambler Police Station nga si Police Major Ananias Vazquez asa natumbok na usab ang upat ka detinado subay sa pagtudlo sa usa ka testigo sa insidente nga nahitabo kaadlawon sa Mayo 5.
Ang biktima nga detinado nga namatay sa selda sa Tambler PNP nailhan kang Philip Nocete, 45-anyos, ulitawo, security guard, residente sa Barangay Calumpang.
Una na usab gipasalig ni Police Major Rissa Hernaez, tigpamaba sa General Santos City Police Office nga giandam na ang kaso batok sa upat subay sa nakakita sa insidente, asa sa nasayran usab nga usa sa suspek ang kanhi matud pa may kasuko sa biktima
Samtang gipamugos ni Marve Joy Maghanoy, igsuon sa biktima nga gusto usab maimbestigahan ang pulis nga duty niadtong nahitabo ang pagpangulata sa iyang igsuon ingon man gustong maimbestigahan ang babayeng mireklamo nga siya gisulayan sa paglugos. Gikumpirma usab ni Nathaniel laing igsuon sa napatay nga midangop na sila sa NBI-SarDo alang sa pagpangayo og hustisya.