GIDALA sa presento sa kapulisan gikan sa Barangay Lagao ang usa ka gwardiya nga naga duty sa usa ka pribadong lugar sa National Highway nga sakop sa Barangay City Heights human gitudlo nga nagpabuto og armas kadlawon sa December 4, 2022 adlaw nga Dominggo.
Subay sa unang report nga naabot sa presento 3 adunay duha ka mga batan-on nga nagreklamo nga adunay nagpabuto og armas duol sa Taewondo Gym sa National Highway alas dos sa kadlawon.
Gi-adtuan kini sa pulis sakay sa patrol ug sa pag abot sa lugar positibo sumala pa nga gitudlo sa duha ka batan-on ang usa ka gwardiya nga mao sumala pa ang nagpabuto ug pusil.
Tungod niini gidala sa pulis si Theodie Galvan Sr., 56-anyos, minyo nga ilawom sa usa ka Security Agency, gikuha usab sa pulis ang iyang bitibit nga 9mm nga pistol, usaka magazine nga may sulod nga lima ka bala, aduna usab serial number ang armas.
Sa paghinabi sa Brigada kay Galvan gisulti niini nga giadtuan na siya sa iyang mga opisyal sa agency aron matabangan sa iyang sitwasyon,dili pa usab daw kini maghatag sa iyang tubag kalabot sa alegasyon, basta nga sigurado siya nga naa lang siya sa iyang post nianang gabhiuna.
Gidala usab kini sa pulis sa Dr. Jorge P. Royeca Hospital aron ma eksamin ang panglawas. I Ver Diazon