Gumikan sa pagtinabangay sa mga gingsakpan sa Coast Guard Sub-station Governor Generoso ug sa tanang available nga mga bangka pangdagat alang sa search and rescue operation, naluwas ang 14 ka mga mananagat Sabado sa buntag, Enero 27, 2024.
Una niini, nakadawat og impormasyon gikan sa Coast Guard Sub-station Lupon kalabotan sa usa ka distressed fishing banca nga mao ang Julius Caesar, nga naa sa 10 nautical miles ang gilay-on sa baybayon sa Brgy. Nangan, Govgen, Davao Oriental.
Alas onse sa buntag sa susamang adlaw, dunay residente sa Brgy. Nangan ang mitawag kalabotan sa gikahimutangan sa mga mananagat ug malampuson kining naluwas sa kaubanang bangka nga mao ang VENUS ug JHON STEVE.
Dali hinoon nga gipangdapatan og tambal ang mga nahisgutan sa mga gingsakpan sa Sub-station ug sa MDRRMC GovGen.
Gipangkontak na usab ang mga kabanay sa mga biktima aron nga makauli na sa ilang tag-sa tagsa ka mga pamilya.
Sa report, naguba ang freeboard sa FBCA Julius Caesar gumikan sa kakusog sa balud sa kadagatan.