Moabot na sa 156 ka motorista ang nadakpan sa mga sakop sa City Transport and Traffic Management Office (CTTMO) Enforcement Team gumikan sa kalapasan sa paggamit sa bike lanes sa syudad.
Sumala kang Ret. Col. Dionisio Abude, Chief sa CTTMO, 45 ka violators ang nakamulta og P500 gawas pa sa posibleng kaso gumikan sa wala pagsunod sa traffic signs gikan Hunyo 12 hangtud 19 nga operasyon human naaktuhan nga nakababag ug iligal nga nagparking sa bike lane.
Mas modako pa ang penalidad sa mga musupak sa higayon nga mapasa na ang modified Bicycle Ordinance sa syudad nga kasamtangan pang gipailawum sa rebisyon ang pipila ka mga probisyon aron mohaum sa specific bike lanes guidelines.
Sa kasamtangan adunay 10 ka sakop sa enforcement team sa CTTMO ang nakamonitor sa nagkadaiyang bike lanes nga gawas sa pagpanakop sa mga masinupakong motorista ug car drivers, mitabang usab sila sa pagpahimangno sa mga bikers sa kaluwasan pinaagi sa pagpabilin sa designated lanes ug ang pagsoot og protective gear.
Plano pang palapdan sa CTTMO ang pag-edukar sa Dabawenyos mahitungod sa sakto nga paggamit sa bike lane pinaagi sa information dissemination gamit ang social media platforms.
Sa pikas bahin, nagpadayon usab karon ang pakig-alayon sa lokal nga panggamhanan sa Department of Public Works and Highways (DPWH) XI sa gikatakdang pagsugod sa pagbutang og bicycle lanes sa Carlos P. Garcia Highway (Diversion Road), Davao-Bukidnon Highway, Matina Aplaya-Ecoland Drive, C. Bangoy St., Ecowest Drive, ug Tulip Drive. BNFM-DAVAO
