Nakumpiska sa mga sakop sa Davao City Police Office (DCPO) ang kapin 6.6 milyon kantidad sa gituohang shabu sulod sa pito (7) ka adlaw nga kampanya batok iligal nga droga sa dakbayan sa Davao, gikan Abril 29 hangtod Mayo 5 ning kasamtangang tuig.
Nunot kini sa padayong paningkamot sa kapulisan, ilawum sa pagdumala ni DCPO, City Director, Pcol Richard Bad-ang, diin malampusong nasikop ang 38 ka drug suspek atol sa 24 ka managlahing anti-illegal drugs operations.
Atol sa operasyon, nakumpiska sa mga dinakpan ang kinatibuk-ang 977.284 grams sa shabu nga mubalor og Php6,645,531.20 ug 279.83 grams sa marijuana nga mubalor sa Php33,579.60.
Paslak na karon sa prisohan ang maong mga suspek, samtang napasaka na sa korte ang 54 ka kaso kalabotan sa iligal droga batok kanila.
Gipasalig usab sa DCPO nga ilang doblehon ang pagpaningkamot aron ilhon ug dakpon ang mga nagkupot og iligal nga droga sa syudad sa Davao.