DILI mabayran og salapi ang kalipay nga gibati sa mga residente sa Habitat Phase A, Barangay Mabuhay GenSan, kini ang gibutyag ni Purok Chairman Roger Lagahit human nga mibisita sa unang higayon ang Brigada team alang sa Brigada Kalingawan ug nanghatag og mga papremyo ug cash prize kaniadtong Sabado, Hunyo 3.
Naabtan pa sa Brigada ang mga kababayinhan ug kalalakin-an nga nag zumba sa gymnasium suot ang mga mabulukon nga biste. Misalmot sa aktibidad ang mga bata, batan-on, lakip mga senior citizen ug silang tanan nalipay sa giapilan nga dula kung asa 50 ka indibidwal ang nakadawat og mga premyo ug kwarta.
Gawas niini nanghatag usab og duha ka selopin nga puno og groceries ang team Brigada sa mga duha ka tawo nga maswerteng napilian, laing usa usab ang nakadawat og libreng ayuda nga bugas ug pangsud-an. Kini ang pamaagi sa team aron maghatod og pahalipay sa mga tigpaminaw ug aron personal nga makahimamat ang mga nagasuporta sa tanang programa sa Brigada News FM GenSan. I Enamie Mogpon