Trending makarun ro sangka Aklanon bangud sa anang sari-saring make-up transformation videos nga may kaangtanan sa social issues.
Sa interview it Brigada News FM Kalibo kay Mr. Enzo Matorres, residente it Brgy. New Buswang Kalibo, Aklan ag nagatrabaho sa Aklan Provincial Hospital, naging inspirasyon nana sa paghimo it video ro mga social issues nga nagakatabo parehu eon lang sa daywang video nga ginatalakay nana ro pagbatun sa LGBTQ members ag ro pinakaulihi nana nga video nga nagatalakay sa women empowerment.
Manami segun sa pamatyag ro paghimo nana it makarondaya nga klaseng content bangud nagatao raya it inspirasyon sa mga tawo ag mas imaw nga ginaganahan nga maghimo it make-up videos bangud maabu ro nakaka-appreciate.
Nakabulig man segun kay Enzo ro pag ubra it make-up videos dahil nakilaea imaw sa patag it pag make-up ag sa makarun hay isaea eonman imaw nga freelance make-up artist.
Sambilog sa main goal ni Enzo sa anang make-up video hay ro maka-inspire sa mga aspiring make-up artist nga padayunon ro andang passion.
Owa man segun imaw nag eaum nga maga-trending ro anang mga videos nga may million views eon bangud ro ana eamang nga gusto hay ro ma-achieve ro gusto nana nga maubra nga make-up looks. / ANN DESLENE SALAZAR