LEGAZPI CITY – Nagtao nin nagkapirang mga pagiromdom an Albay Provincial Youth and Sports Development Office (PYSDO) sa mga jovenes na igwa nin planong magdalagan para sa maabot sa Sangguniang Kabataan Elections.
Sa intrevista kan Brigada News FM Legazpi kay Rhondon Ricafort, head kan nasambitan na opisina, pigsabi niya na ngunyan pa sana dapat nang magin preparado huli ta sa Agosto 28 an puon kan filling kan certificate of candidacy.
Enot digdi, dapat aram ninda kun ano an ley na nakapalaman sa pagigin SK o a Republic Act No. 10742 na naamyendaran kan Republic Act No. 11768.
Bago magdaralagan bilang chairman o mga kagawad ning SK, dapat su boot na at least nabasa man lamang an dapit sa ley na ini.
Tinawan-duon man ni Ricafort an mahigot na pagbawal sa vote buying kan mga madaralagan.
Apwera digdi, dapat su boot na malinaw an mga plataporma asin siyertuhon na ini mailalatag nin maray.
Mientrastanto, pigpapagiromdoman man ni Ricafort an mga maboroto na pilion ki maray an ieelehir, dapat su may kapasidad asin bako sana su mga bastang kamiridbid na bako man sana kwalipikado.