LEGAZPI CITY – Pig-aandaman na kan Bureau of Fisheries and Aquatic Resources (BFAR) Bicol an papaabot na El Niño phenomenon orog na sa mga magigin epekto kaini sa mga parasisira.
Sa intrevista kan Brigada News FM Legazpi kay BFAR Bicol Information Officer Rowena Briones, sinabi niya na igwa na sindang mitigation plan nganing mabawasan an epekto kaini sa mga fisher folks orog na duman sa mga land-based o aquaculture siring kan mga fish pond operators.
Parte kaini an close monitoring sa water quality.
Kasabay man digdi an disease monitoring and surveillance huli ta an nasambit na phenomenon, pwedesir magkawsa nin disease outbreak sa mga hayop sa kadagatan.
Segun saiya, dapat namo-monitor an kahelangan na posibleng makua kan mga sira oras na uminabot na an El Niño, pati naman an red tide kun sain saro sa factors an pabagu-bagong temperatura.
Apwera digdi, mas papakusugon kan saindang opisina an produksyon sa paagi kan mariculture park.
Mientrastanto, antes su boot sindang mag-come up sa mitigation plan, nakipagkoordinar muna sinda asin pinakusog an information campaign sa mga parasira sa paagi kan mga lokal na gobyerno.