LEGAZPI CITY – Makakaresibe na nin cash incentives asin plaque of recognition an mga topnotchers kan board/bar/licensure exams kan Professional Regulations Commission (PRC) na gikan sa syudad kan Legazpi.
Ini makalihis na maaprubahan an pigbusol na ordinansa ni Coun. Alexander Jao na nagtatao nin insentiba sa mga topnotchers.
Sa intrevista saiya kan Brigada News FM Legazpi, sinabi niya na makalihis ini kan haros sarong taong serye nin mga readings asin hearings sa sanggunian.
Segun saiya, an mga topnotchers na bona fide na residente kan syudad na graduate sa mga unibersidad o kolehiyo sa Legazpi, makakaresibe nin incentives na PHP35,000 kun Rank 1-5 asin PHP20,000 kun Rank 6-10.
Mientras, kun an sarong topnotcher na residente kan syudad alagad nagklase sa luwas kan Legazpi, makakaresibe man giraray ini nin cash incentives na PHP20,000 para sa Rank 1-5 mantang PHP15,000 para sa Rank 6-10.
Segun pa ki Jao, PHP500,000 na kantidad nin pondo an iaalokar kan LGU para digdi taon-taon asin mapuon ini sa 2024. Alagad nagahagad man siya na sana madugangan pa an nasambit na pondo nganing dai magkulang en kaso dakol an magin topnotchers.