NAGPAHIMANGNO ang electric distribution utility nga posibleng mag brownout tunga sa bahad sa El Niño, hinungdan nga panawagan nila magdaginot sa kuryente.
Sa maong mga panahon, sagad mosipa ang konsumo sa kuryente ug gilaomang mograbe pa kini tungod sa bahad sa El Niño, butyag ni Joy Celeste Alora, Institutional Services Department Officer-In-Charge sa Socoteco-II.
Sa pagbana-bana sa distribution utility, mosaka pa ang demand sa kuryente sa mga mosunod nga bulan, rason nga dili imposible ang power interruption. Hinoon, dunay dugang supply gikan sa mga power plant apan giangkon ni Alora nga dili mapugngan ang pagpalyar sa mga planta asa apektado niini ang mga linya sa kuryente.
Samtang nanawagan ang distribution utility sa mga konsumante nga magdaginot sa konsumo sa kuryente. Alang usab kang Joyce Ranque, maghimo sila og estratehiya sa salon aron makadaginit sa konsumo sa kuryente. Dugang ni Alora, nagsugod na sila karon og inspeksyon sa mga linya sa kuryente bag-o ang ting-init. I Richel Gubalani