WALA maka-ikyas sa kapulisan ang usa ka drug-den owner kuyog sa duha niini nga kaubanan dihang nabulabog sa otoridad ang ilang iligal nga gimbuhataon sa pagkalambigit sa iligal nga droga.
Sa gipahigayon nga drug buy bust operation sa Ilang-ilang Street, Barangay Cannery Site, Polomolok, South Cotabato niadtong Mayo 10 sa hapon nga gipangunahan sa Philippine Drug Enforcement Agency -PDEA Sultan Kudarat, PDEA South Cotabato Provincial Office ug mga personahi sa Police station 4 sa General Santos City Police Office.
Miresulta kini sa pagka-aresto nilang Roy Tormon, 40-anyos, drug-den owner, nagpuyo sa Cannery Housing, Brgy Cannery Site, Polomolok; Joshua Berdigay, taga Soriano Subd. Brgy City Heights Gensan, ug usa ka graphic artist nga naila kang Chan Aba, taga Purok Malipayaon, Cannery Site Polomolok.
Naimbargo sa kapulisan gikan sa mga suspek ang kapin sa 12 gramo iligal nga droga nga nagkantidad sa P81,600 pesos, lakip ang buy-bust money ug mga drug paraphernalia. Gikustodiya na karon sa PDEA Custodial facility Regional Office-12 ang tulo ka akusado samtang mag-atubang og kasupakan sa Section 5 ug 11 sa RA 9165 tungod sa pagkalambigit sa gidili nga droga. I Enamie Mogpon