LEGAZPI CITY – Arestado an sarong lalaking tulak nin iligal na droga makalihis na ikondusir an drug buy-bust operasyon kan Sto. Domingo Drug Enforcement Unit sa Phase 3, Purok 4, Brgy. San Andres, Sto. Domingo, Albay, alas 8:16 kasubanggi.
Binisto an suspek na si alyas “Galog”, 31 anyos, warang trabaho asin residente kan kaparehong lugar.
Nadakop ini makalihis na makabakal saiya an poseur buyer ki selyadong plastic sachet nin pinagtutubudang shabu kapalit nin P500.
Narekober pa saiya an tulong pidasong plastic na naglalaog nin pinagtutubudang shabu na may pigkakalkulong gabat na duwang gramo sa kantidad na poko mas omenos P13,600 asin iba pang non-drug items.
Nahahampang ini sa kasong pagbalgar sa RA 9165 asin nasa kustodiya na kan mga pulisya para sa magkakanigong disposisyon.