Na-rescue sa mga sakop sa Coast Guard District Southeastern Mindanao ang duha ka indibiwal nga nahulog gikan sa pampasaherong lansta nga MB Puting Bato niadtong Lunes sa gabii gikan sa Babak, IGACOS paingon sa syudad sa Davao.
Ang duha nailang taga-Tagpuri, Panabo City, Davao del Norte ug nasayran nga lango sa ilimnong makahubog ang mga biktima.
Atol sa maong pagkahulog, daling nanawag og tabang ang checker sa pantalan sa Km11, Sasa nga si Isabel C Mabao ngadto sa Coast Guard Sub-Station (CGSS KM 11).
Paspas usab nga girespondihan sa mga personahe sa Coast Guard ug gilusad ang search and rescue operation ug malampuson nga narescue.
Gipahinumdoman na lamang sa Coast Guard District Southeastern Mindanao ang mga manakayay nga unahon ang kaluwasan ug responsable nga pamatasan, labi na kung sakay sa mga barko o lansta.
Kini nga insidente magsilbi nga pahinumdom sa mga posibleng peligrong mahitabo kung lango sa ilimnong makahubog sa mga delikadong lugar.