Nangayo na og tabang ang hepe sa kapulisan sa Gensan ngadto sa buhatan ni City Mayor Ronnel Rivera kalabot sa ilang problema sa bill sa kuryente nga mokabat sa 8 million pesos.
Una nang nabalaka si PCol. Gilberto Tuzon, director GenSan City Police Office (GSCPO) nga marelib ug maputlan og kuryente tungod sa utang sa kapulisan sa South Cotabato Electric Cooperative (SOCOTECO) II.
“This is a big problem for me right now and it could cause my relief as advised by our regional headquarters,” sigun ni Tuzon.
Ang maong problema maoy usa sa mga rason sa pagpakita ni Tuzon sa sesyon, Martes (July 13) aron mapaabot sa mga konsehal ang ilang problema ug makapangayo og tabang sa mayor.
Giklaro usab ni Tuzon nga nasunod lang niya ang problema gikan sa mga nakalabay’ng city director sa Gensan.
Dugang sa hepe, ginakuhaan na og liboan ka pesos ang ilang Maintenance and Other Operating Expenses (MOOE) aron ibayad sa kuryente apan kulang gihapon.
Gibutyag usab niini nga dili lang sila ang ga-gamit sa kuryente sulod sa Camp Fermin Lira, duna usab mga unit ug ubang ahensiya sa gobyerno nga naa sulod sa baracks.