KALIBO, AKLAN—Nasae-an nga may sueod nga bomba do gin-abandonang bag nga naaywan sa karsada sa bahin it Brgy. Bagto, Lezo, Aklan.
Base sa report, nakabaton it impormasyon do Provincial EOD/K9 Unit Aklan (Bomb Squad) halin sa Chief of police it Lezo MPS kung siin insigida man nga nagresponde sanday PLT Vengie Repedro, team leader it PECU Aklan ag Police Chief Master Sergeant Genesis Reynaldo para i-verify do report.
Pag-abot sa lugar hay nagpatigayon it paneling ag inspection do team sa nasambit nga bag ag matapos do maid-id nga pag-inspection hay na-verify nga owa raya it sueod nga pampasabog.
Sa pagpangusisa, do nasambit nga bag hay may sueod nga kagamitan ukon mass kit nga ginapatihan nga ginapanag-iyahan it sangka pari nga sa makarun hay una sa kustodiya it Lezo PNP. // SHERRY ANNE REUNIR-VIDAL